D’Aarbecht ass a bleift ee vun de wichtegste Piliere vun eiser Gesellschaft. Si suergt net nëmmen dofir, dass d’Leit e Liewen an Dignitéit féiere kënnen, mee verbënnt eis och duerch Engagement, Zesummenhalt a Verantwortung.
An enger Zäit vu wirtschaftleche Spannungen, techneschem Wandel a sozialen Onsécherheeten ass et méi wichteg wéi jee, dass mir eis Aarbechtswelt gerecht, nohalteg a mat Mënscheverstand gestalten. Dobäi spillt de sozialen Dialog, d’Stäerkung vu Kollektivverträg an de Schutz vun de Rechter vun de Schaffenden eng zentral Roll.
Leider gesi mir, dass dës Grondwäerter a ville Beräicher net méi déi Plaz hunn, déi se verdéngen. De politesche Wëllen, fir e fairen Aarbechtsmarché mat staarke soziale Strukturen z’erhalen, feelt op ville Plazen.
Als LSAP soe mir kloer: Mir wëllen eng Aarbechtswelt, déi fir all Mënsch funktionéiert – net just fir e puer.
Aktuell fiert d’Regierung awer e geféierleche Cours: De sozialen Dialog? Ignoréiert. D’Roll vun de Kollektivverträg? Ënnerschat. D’Stëmm vun de Schaffenden? Net gelauschtert.
Dobäi ass kloer: Nëmmen duerch e staarken a respektéierte Sozialdialog kënne mir fair Aarbechtskonditiounen a sozial Gerechtegkeet garantéieren. Mir als LSAP sti kloer un der Säit vun de Schaffenden – a wéi ëmmer kämpfe mir fir hir Rechter a Perspektiven.
Wat leeft falsch?
Zanter dem Regierungswiessel gesi mir eng geféierlech Tendenz:
- Kollektivverträg ginn a Fro gestallt oder blockéiert.
- Gewerkschafte ginn net méi als gläichberechtegte Partner ugesi, de sozialen Dialog gëtt geziilt geschwächt.
- Aarbechtsrechter ginn net méi moderniséiert.
Wou ass d’Visioun? Wou ass d’Verantwortung? Anstatt d’Aarbechtswelt aktiv ze gestalten, steet d’Regierung op der Brems vun all sozialem Fortschrëtt.
Wourunner mir als LSAP gleewen a wat mir fuerderen:
✅ E gestäerkte Sozialdialog – Mir fuerderen eng verbindlech Matbestëmmung vun de Gewerkschafte bei allen Entscheedunge ronderëm d’Aarbechtswelt. E staarke Sozialdialog ass keen “Nice to have”, mee d’Basis vun eiser sozialer Zesummenaarbecht.
✅ Verbindlech Kollektivverträg – A ville Secteure feelen nach ëmmer fair a kloer Reegelen. Mir wëlle gesetzlech garantéieren, datt all Secteur iwwer Kollektivverträg ofgedeckt gëtt – besonnesch am Gesondheets- a Sozialwiesen.
✅ Gläich Rechter fir all Salarié – Egal ob Vollzäit, Deelzäit oder temporär: All Mënsch verdéngt eng fair Bezuelung, Sécherheet an e Matbestëmmungsrecht.
✅ Eng gerecht Digitaliséierung – Technologie däerf net benotzt ginn, fir Rechter auszehillegen. De Mënsch steet bei eis am Mëttelpunkt.
Well et e bessere Wee gëtt: D’Aarbecht zu Lëtzebuerg verdéngt Respekt – an en Aarbechtsminister, dee Verantwortung iwwerhëlt. Mir kämpfe fir gutt Konditiounen, gerecht Léin an eng sozial ofgeséchert Zukunft. Fir e Land, wou jidderee seng Plaz huet.
Zesumme packe mir dat – sozial, gerecht a solidaresch.
