Här President,
sou wéi den Artikel 80 vum Chambersreglement et virgesäit, bieden ech Iech, dës parlamentaresch Fro un d’Madamm Ministesch fir Fuerschung an Héichschoul weiderzeleeden.
Bourssen a Prêten am Kader vun der staatlecher Studiebäihëllef (AideFi) erméiglechen et ville Jonken en Universitéitsstudium ze finanzéieren. De Studenteprêt ass staatlech garantéiert an den Zënssaz ass op maximal 2% fir de Student begrenzt. Et ass virausgesat, datt de Studenteprêt bei enger Bank opgeholl gëtt, déi en entspriechenden Accord mam Staat huet. Aktuell hu fënnef Banken esou e staatlechen Accord.
Mengen Informatiounen no hu rezent eng Rei Betraffener misse feststellen, datt hir Mensualitéite fir d’Zeréckbezuele vum Studenteprêt considerabel gehéicht gi sinn, well den Zënssaz iwwer 2% eropgesat ginn ass.
An deem Kontext wéilt ech der Madamm Ministesch fir Fuerschung an Héichschoul follgend Froe stellen:
- Kann d’Madamm Ministesch confirméieren, datt rezent d’Mensualitéite vu Studenteprêten op en Zënssaz vun iwwer 2% gehéicht goufen? Wa jo, wéi vill Prêten si betraff a wéi eng Banken hunn esou eng net-gesetzeskonform Erhéijung praktizéiert? Wa jo, wéi eng Konsequenzen huet d’Madamm Ministesch wëlles ze zéien?
- Generell, wéi eng Moossnamen hëlt d’Regierung fir sécherzestellen, datt all d’Modalitéite vum Gesetz iwwert d’Studenteprête respektéiert ginn?
- Wéi genee gesinn déi praktesch Modalitéiten aus, fir datt de Beneficiaire vum Prêt zu kengem Zäitpunkt Mensualitéite bezuele muss, déi méi wéi déi dem maximalen Zënssaz vun 2% entspriechen?
Mat déiwem Respekt,
Mars Di Bartolomeo – Député
Pour la réponse, veuillez suivre le lien suivant: QP n°1105
*Si la réponse n’apparaît pas, elle est encore en cours de préparation.